⚡️Nukus aylanma yoʻlida ta’mirlash ishlari olib borilmoqdaa

Nukus shahri hududidan o‘tuvchi D234 (4R176V) “А380 avtomobil yo‘liga chiqish yo‘li”da ta’mirlash ishlari olib borilmoqda. Hozirda avtomobil yo‘lining 9–10-kilometrida joylashgan temir yo‘l kesishmasida 200 metr uzunlikdagi qism sement-beton qoplamaliga o‘tkazilmoqda. Qoplama qalinligi 20 santimetrni, eni esa 7 metrni tashkil etadi.

Ta’mirlash ishlari Qoratov Yo‘llardan muntazam foydalanish davlat muassasasi tomonidan amalga oshirilmoqda. Ushbu yo‘l davlat ahamiyatiga ega.

Temir yo‘l kesishmalarida yuk mashinalarining to‘xtashi asfalt qoplamasiga zarar yetkazib kelgan. Shu sababli ushbu qism sement-beton qoplamaga o’tkazilmoqda. U asfaltga nisbatan mustahkamroq, uzoq muddat xizmat qiladi va transport harakati xavfsizligini ta’minlaydi.

Mazkur yo‘l Nukus shahrini aylanib o‘tishda muhim ahamiyat kasb etadi. U orqali Kegayli, Chimboy, Qorao‘zak va Taxtako‘pir tumanlariga tashrif buyuruvchilar shahar ichiga kirmasdan harakatlana oladi. Bu vaqtni tejashga yordam beradi va Nukus shahridagi transport tirbandliklarining oldini oladi.

Shuningdek, yo‘l tumanlardan eksport qilinayotgan mahsulotlarni tashiydigan yuk avtomashinalarining harakati uchun ham qulaylik yaratadi. U orqali A380 avtomobil yo‘liga chiqish imkoni yaratiladi va bu esa Respublikamizning boshqa hududlariga tezkor hamda samarali yetib borishni ta’minlaydi.