⚡️Nókis aylanba jolında ońlaw jumısları alıp barılmaqta

Nókis qalası aymaǵınan ótiwshi D234 (4R176V) “A380 avtomobil jolına shıǵıw jolı”nda ońlaw jumısları alıp barılmaqta. Házirgi waqıtta avtomobil jolınıń 9-10-kilometrinde jaylasqan temir jol kesilispesinde 200 metr uzınlıqtaǵı bólim cement-beton qaplamasına ótkerilmekte. Qaplamnıń qalıńlıǵı 20 santimetrdi, eni bolsa 7 metrdi quraydı.

Ońlaw jumısları Qarataw Jollardan turaqlı paydalanıw mámleketlik shólkemi tárepinen ámelge asırılmaqta. Bul jol mámleketlik áhmiyetke iye.

Temir jol kesilispelerinde júk mashinalarınıń toqtawı asfalt qaplamasına zıyan jetkergen. Sol sebepli cement-beton qaplama qollanılmaqta. Ol asfaltqa salıstırǵanda bekkemirek, uzaq múddet xızmet etedi hám transport háreketi qáwipsizligin támiyinleydi.

Bul jol Nókis qalasın aylanıp ótiwde úlken áhmiyetke iye. Ol arqalı Kegeyli, Shımbay, Qaraózek hám Taxtakópir rayonlarına keliwshiler qala ishine kirmesten háreketlene aladı. Bul waqıttı únemlewge járdem beredi hám Nókis qalasındaǵı transport tıǵılıslarınıń aldın aladı. 

Sonday-aq, jol rayonlardan eksport etilip atırǵan ónimlerdi tasıytuǵın júk avtomashinalarınıń háreketi ushın da qolaylıq jaratadı. Ol arqalı A380 avtomobil jolına shıǵıw imkaniyatı jaratıladı hám bul bolsa Respublikamızdıń basqa aymaqlarına tez hám nátiyjeli jetip barıwdı támiyinleydi.