Bas basqarma tariyxı

Ózbekstan Respublikası Prezidentiniń 2017-jıl 14-fevraldaǵı “Jol xojalıǵın basqarıw sistemasın bunnan bılay da jetilistiriw ilajları haqqında”ǵı PP-4954-sanlı Pármanına tiykarlanıp tamamlanıp atırǵan Avtomobil jolların qurıw hám paydalanıw mámleketlik-akcionerlik kompaniyası (“Ózavtojol” MAK) negizinde Ózbekstan Respublikası Avtomobil jolları mámleketlik komiteti shólkemlestirilgen.

Ózbekstan Respublikası Prezidentiniń 2017-jıl 14-fevraldaǵı “Ózbekstan Respublikası Avtomobil jolları mámleketlik komiteti hám Ózbekstan Respublikası Ministrler Kabineti janındaǵı Respublikalıq jol qorınıń jumısın shólkemlestiriw haqqında”ǵı PQ-2776-sanlı qararına muwapıq Qaraqalpaqstan Respublikası avtomobil jolları aymaqlıq bas basqarması (keyingi orınlarda – “Bas basqarma”) Ózbekstan Respublikası Avtomobil jolları mámleketlik komitetiniń shólkemlestiriw strukturasına kirgizilgen bolıp, Ózbekstan Respublikası Avtomobil jolları mámleketlik komitetiniń (keyingi orınlarda – “shólkemlestiriwshi”) 2017-jıl 29-marttaǵı 06-sanlı buyrıǵına tiykar shólkemlestirilgen. Usı Nızam Bas basqarmanıń statusı, tiykarǵı wazıypaları, funkciyaları, huqıqları hám jumısınıń shólkemlestiriwshilik tiykarların belgileydi.

Bas basqarmanıń tolıq atı:

qaraqalpaq tilinde – Qaraqalpaqstan Respublikası avtomobil jolları aymaqlıq bas basqarması (qısqartpası – Qaraqalpaqstan Respublikası AJBB);

ózbek tilinde – Qoraqalpog‘iston Respublikasi avtomobil o‘llari hududiy bosh boshqarmasi (qisqartmasi – Qoraqalpog‘iston Respublikasi AYHBB);

rus tilinde – Территориальное главное управление по автомобильным дорогам Республики Каракалпакстан (qısqartpası – ТГУАД Республики Каракалпакстан).

Qaraqalpaqstan Respublikası avtomobil jolları aymaqlıq bas basqarması – “Qaraqalpaqavtojol” aymaqlıq jollardan paydalanıw shólkeminiń huqıqıy miyrasxorı esaplanadı. Bas basqarma óz jumısın Ózbekstan Respublikası Konstituciyası hám nızamlarına, Ózbekstan Respublikası Oliy Majlisi palatalarınıń qararlarına, Ózbekstan Respublikası Prezidentiniń pármanları, qararları hám biyliklerine, Ózbekstan Respublikası Ministrler Kabinetiniń qararları hám biyliklerine, Shólkemlestiriwshiniń qararları, biylikleri hám buyrıqlarına, usı Rejege jáne tarawǵa baylanıslı basqa da nızam hújjetlerine muwapıq ámelge asıradı. Bas basqarma óz jumısın tolıq xojalıq esabı tiykarında ámelge asıradı hám tikkeley Shólkemlestiriwshige boysınadı.

Ózbekstan Respublikası avtomobil jolları mámleketlik komiteti Bas basqarmanıń Shólkemlestiriwshisi esaplanadı. Bas basqarma óz wazıypaları hám funkciyaların ámelge asırıwda mámleketlik hám xojalıq basqarıw uyımları, jergilikli atqarıwshı hákimiyat uyımları hám basqa da shólkemler menen óz-ara birge islesedi.

Bas basqarma Qaraqalpaqstan Respublikasındaǵı avtomobil jolların mámleket tárepinen basqaratuǵın arnawlı wákillikli uyım bolıp tabıladı hám Qaraqalpaqstan aymaǵındaǵı avtomobil jolları tarawında Shólkemlestiriwshiniń birden-bir texnika siyasatın alıp baradı.

Bas basqarma quramına Qaraqalpaqstan Respublikası aymaǵında jaylasqan rayonlıq jollardan paydalanıw unitar kárxanaları, kópirlerden paydalanıw unitar kárxanası, jollardan turaqlı paydalanıw unitar kárxanaları, mámleketlik unitar kárxana túrindegi Regionallıq jollarǵa buyırtpashı xızmeti, unitar kárxana túrindegi regionallıq avtomobil jolların ońlaw boyınsha qánigelestirilgen kárxanalar hám de Shólkemlestiriwshi tárepinen belgilengen tártipte jańadan shólkemlestiriletuǵın kárxana hám shólkemler kiredi.

Bas basqarma quramına kiriwshi kárxana hám shólkemler ózleriniń xojalıq biyǵárezligin hám yuridikalıq shaxs statusın saqlap qaladı.