⚡️ Taqıyatas rayonına alıp barıwshı avtomobil jolında ońlaw jumısları alıp barılmaqta

Mámleketimizde jol infrastrukturasın rawajlandırıwǵa qaratılǵan izbe-iz reformalar hár bir aymaqta óz nátiyjelerin bermekte. Prezidentimizdiń baslaması menen, ásirese, uzaq hám strategiyalıq jaqtan áhmiyetli baǵdarlarda zamanagóy, qáwipsiz hám qolaylı jollar qurılmaqta.

Atap aytqanda, D154 “A380 avtomobil jolınan (775-km) – Taqıyatas qalası” avtomobil jolınıń 1-4-kilometr aralıǵında 2 kilometr 535 metr bólegine qara qaplamalı asfalt tósew jumısları ámelge asırılmaqta. Bul jol Qaraqalpaqstan Respublikasınıń ekonomikalıq oraylarınan biri – Taqıyatas qalası menen tiykarǵı magistraldı baylanıstırıp turatuǵın áhmiyetli transport jónelisi bolıp esaplanadı.

Házirgi waqıtta ońlaw jumısları Taqıyatas rayonı Jollardan paydalanıw mámleketlik shólkemi tárepinen alıp barılmaqta. Processke 7 arnawlı texnika hám 13 maman jumısshı-xızmetker tartılǵan.

Bul jol tek xalıq ushın qolaylıq jaratıp ǵana qoymastan, al iri sanaat kárxanalarınıń jumısı hám eksport-import processleriniń úzliksizligin támiyinleytuǵın áhmiyetli baǵdar bolıp esaplanadı.

Atap ótiw kerek, avtomobil jolınıń bul bólegin ońlaw jumısları “Baslamalı budjet” baǵdarlamasınıń 2025-jıl 1-máwsiminde jeńimpaz bolǵan edi.