⚡️RÁSMIY MÚNÁSIBET

Sociallıq tarmaqlarda tarqalǵan múrájatqa (https://t.me/Kar24Uz/45428) Qaraqalpaqstan Respublikası Avtomobil jolları bas basqarması rásmiy múnásibet bildiredi.

Múrájatta Nókis qalası aymaǵınan ótiwshi D234 “Nókis – Temir jol vokzalı” (A. Dosnazarov kóshesi) avtomobil jolınıń 8-9-kilometr aralıǵında jol qaplamasında júzege kelgen nasazlıqlar sáwlelendirilgen.

Anıqlanıwınsha, jol qatlamınıń buzılıwına jol astınan ótken kanalizaciya qubırlarınıń jaramsız halǵa kelgenligi hám olardıń izbe-iz jarılıwı sebep bolǵan. Suw aǵıp shıǵıwı nátiyjesinde jol tiykarına zıyan jetken hám bul jaǵday joldıń qayta buzılıwına alıp kelgen.

Bul jol bóleginde Qaraqalpaqstan Respublikası Jollardan turaqlı paydalanıw mámleketlik shólkemi tárepinen bir neshe márte ońlaw jumısları ámelge asırılǵan. Biraq, qubırlardaǵı mashqalalar tolıq saplastırılmaǵanı sebepli, jol qısqa múddet ishinde jáne ońlawǵa mútáj jaǵdayǵa kelip qalǵan.

Tiyisli shólkemler tárepinen kanalizaciya tarmaǵındaǵı nasazlıqlar tolıq saplastırılǵannan keyin, avtomobil jolındaǵı kemshiliklerdi tiklew de áyne usı shólkemler tárepinen belgilengen tártipte ámelge asırılıwı belgilengen.

Sonı ayrıqsha atap ótiw kerek, Qaraqalpaqstan Respublikası Avtomobil jolları bas basqarması kanalizaciya qubırlarınan kelip shıqqan texnikalıq mashqalalar ushın juwapker emes. “Avtomobil jolları haqqında”ǵı Ózbekstan Respublikası Nızamınıń 19-statyasına muwapıq, avtomobil jollarına zıyan jetkergen yuridikalıq yamasa fizikalıq shaxslar jetkerilgen zıyandı óz qarjıları esabınan tiklewi shárt. Sol sebepli, kanalizaciya tarmaqlarınan kelip shıqqan nasazlıqlar sebepli buzılǵan jol qaplaması da usı sistemalarǵa iyelik etiwshi tiyisli shólkemler tárepinen belgilengen tártipte ońlanıwı kerek.

Qaraqalpaqstan Respublikası Avtomobil jolları bas basqarması tárepinen tiyisli shólkemler menen avtomobil jolında júzege kelgen kemshiliklerdi belgilengen tártipte saplastırıw boyınsha shólkemlestiriwshilik jumıslar alıp barılıp atırǵanlıǵın málim etemiz.

🏢Qaraqalpaqstan Respublikası Avtomobil jolları bas basqarması málimleme xızmeti