🎓 Jol injenerligi baǵdarı studentleri menen ámeliyat aldınan ashıq sáwbet ótkerildi

Búgin Berdaq atındaǵı Qaraqalpaq mámleketlik universitetiniń Arxitektura fakulteti “Jol injenerligi” baǵdarında oqıp atırǵan 2–3-basqısh studentleri menen ámeliyat aldınan ashıq sáwbet shólkemlestirildi.

Ushırasıw Qaraqalpaqstan Respublikası Avtomobil jolları bas basqarması májilisler zalında bolıp ótti. Ushırasıwda Basqarmanıń bas injeneri Yusup Ernazarov, basqarma baslıǵınıń orınbasarı Ravshanbek Ibragimov hám insan resursları boyınsha inspektor hám universitettiń oqıtıwshıları qatnastı.

Dáslep studentlerge jol xojalıǵı sisteması, ámeliyat tártibi, óndiristegi texnikalıq qáwipsizlik qaǵıydaları hám kásipke baylanıslı juwapkershilik haqqında tolıq túsinikler berildi. Sonday-aq, olar ózlerin qızıqtırǵan sorawlar menen qánigeler menen ashıq sáwbetlesti.

Ushırasıw juwmaǵında studentler ámeliy shınıǵıwlardı ótew ushın tiyisli rayonlardaǵı Jollardan paydalanıw mámleketlik shólkemlerine jiberildi.

Bul ushırasıw studentlerdiń keleshektegi kásiplik iskerligine tayarlanıwında áhmiyetli basqısh bolıp, ámeliy bilimlerdi iyelewde úlken áhmiyetke iye boldı.