⚡️Avtomobil jollarında háreket qáwipsizligin támiyinlew – áhmiyetli wazıypa

Qaraqalpaqstan Respublikası Avtomobil jolları bas basqarması hám Avtomobil jolları texnikalıq jaǵdayın tallaw hám háreket qáwipsizligi orayı mámleketlik shólkemi tárepinen usı jıl dawamında Qaraqalpaqstan Respublikası aymaǵındaǵı ulıwma paydalanıwdaǵı avtomobil jollarında háreket qáwipsizligin támiyinlewge qaratılǵan sistemalı hám kompleksli jumıslar alıp barılmaqta.

Atap aytqanda, xalıqaralıq, mámleketlik hám jergilikli áhmiyetke iye avtomobil jollarında 690 kilometr jatıq jol sızıqları jańadan sızıldı, 2 mıń 379 jol belgileri jańalandı, 17 biyik piyadalar ótiw orınları shólkemlestirildi, mektep, baqsha hám sociallıq obektler janında piyadalardıń qáwipsizligin támiyinlew boyınsha piyadalar jolı jańalandı.

Joqarıda atap ótilgen jumıslar jol háreketi qatnasıwshıları ushın qáwipsiz hám qolaylı ortalıq jaratıw, sonday-aq, jol-transport hádiyseleriniń aldın alıwda áhmiyetli faktor bolıp xızmet etpekte. Qaraqalpaqstan Respublikası aymaǵında avtomobil jollarınıń texnikalıq jaǵdayın jaqsılaw, háreket qáwipsizligin támiyinlew hám insan ómirin saqlawǵa qaratılǵan bul sıyaqlı sistemalı jumıslar izbe-iz dawam ettirilmekte.