⚡️A380 avtomobil jolında rekonstrukciya jumısları dawam etpekte

A380 “Ǵuzar—Buxara—Nókis—Beynew” avtomobil jolı xalıqaralıq transport jónelisiniń Ózbekstandaǵı bólegi esaplanıp, ol arqalı Oraylıq hám Shıǵıs Evropa, Rossiya, Ukrayına hám Qazaqstanǵa shıǵıw támiyinlenedi hám Ózbekstan arqalı trans-awǵan transport jónelisine jalǵanadı. Bul avtomagistral Qaraqalpaqstan Respublikası, Xorezm, Buxara hám Qashqadárya wálayatları aymaǵınan ótip, mámleketler, wálayatlar aralıq baylanıslardı támiyinlewde de áhmiyetli buwın esaplanadı.

Avtomobil jolın Xalıqaralıq standartlarģa say, ótkeziwshenlik qábiletin arttırıw boyınsha Húrmetli Prezidentimiz tárepinen bir qansha qarar hám pármanlar qabıl etilip, búgingi kúnde usı qararlar tiykarında avtomobil jolında keń kólemli qurılıs-ońlaw jumısları alıp barılıp atır.

Atap aytqanda, Húrmetli Prezidentimizdiń 2024-jıl 24-dekabr kúngi “2025 — 2027-jıllarda Ózbekstan Respublikasınıń sociallıq hám óndirislik infrastrukturasın rawajlandırıw ilajları haqqında”ģı PQ-454-sanlı qararı tiykarında A-380 “Ǵuzar—Buxara—Nókis—Beynew” avtomobil jolınıń 698—723-km aralıģında qurılıs ońlaw jumısları qızģın alıp barılmaqta. Qurılıs jumısları úshin 2025-jılģa 71.2 mlrd sumlıq islew shartnamaları túzilgen.

Házirgi waqıtta Qıpshaq Jollardan turaqlı paydalanıw mámleketlik shólkemi tárepinen 720-721- km bóleginde asfalt jatqızıw jumısları ámelge asırılıp atır. Bul jumıslarģa jámi 20 dan aslam mashina-mexanizimleri, 30 dan aslam jumısshılar mobilizatsiya etilgen. Qarılısshı shólkem tárepinen qurılıs jumısların jıl axırına juwmaqlap, obyektti paydalanıwģa tapsırıw rejelestirilgen.