⚡️Ǵárezsizlik bayramı aldında sistemadaǵı áhmiyetli wazıypalar belgilendi

Búgin Qaraqalpaqstan Respublikası Avtomobil jolları Bas basqarmasında rayonlıq jollardan paydalanıw mámleketlik shólkemleri direktorları hám basqarma xızmetkerleriniń qatnasıwında májilis bolıp ótti.

Onda Bas basqarma baslıǵı U.Matnazarov qatnasıp, sistemada ámelge asırılıp atırǵan jumıslar, bar máseleler hám aldaǵı orınlanıwı tiyis wazıypalar boyınsha tiyisli kórsetpe hám tapsırmalar berdi.

Májiliste mámleketimiz Ǵárezsizliginiń 35 jıllıǵın múnásip hám kóterińki keypiyatta belgilew, bayram ilajların joqarı dárejede shólkemlestiriw máselelerine ayrıqsha itibar qaratıldı.

Májiliste ulıwma paydalanıwdaǵı avtomobil jolları janında jaylasqan mektep, mektepke shekemgi bilimlendiriw shólkemleri hám basqa da bilimlendiriw mákemeleri aldındaǵı piyadalar ótiw orınların jańalaw, jol sızıqların qayta tiklew, jol belgileri hám basqa da jol elementlerin tártipke keltiriw boyınsha anıq wazıypalar belgilendi.

Juwapkerlerge belgilengen jumıslardı óz waqtında hám sapalı orınlaw, ásirese, bilimlendiriw mákemeleri átirapında piyadalar hám jol háreketi qatnasıwshılarınıń qáwipsizligin támiyinlewge ayrıqsha itibar qaratıw tapsırıldı.

Basqarma baslıǵı májilis juwmaǵında jámáát aǵzaları jaqınlasıp kiyatırǵan Ózbekstan Respublikası Ǵárezsizliginiń 35 jıllıǵı menen qutlıqlanıp, olarǵa bekkem densawlıq, shańaraqlıq tınıshlıq, abadanlıq hám keleshektegi jumıslarında tabıslar tiledi.