⚡️Qanlıkól rayonında áhmiyetli avtomobil jolı ońlanbaqta

Húrmetli Prezidentimizdiń 2026-jıl 5-fevraldaǵı PQ-49-sanlı “2026-jılı aymaqlardı rawajlandırıw arqalı xalıqtıń dáramatın arttırıw, turaqlı jumıs orınların jaratıw hám kámbaǵallıqtı qısqartıw ilajları haqqında”ǵı qararına muwapıq, mámleketimizdiń infrastrukturası salıstırmalı awır hám kámbaǵallıq dárejesi joqarı bolǵan máhállelerinde keń kólemli dóretiwshilik jumısları alıp barılmaqta.

Usı baǵdarlama sheńberinde Qanlıkól rayonınıń “Sarı altın” APJ aymaǵınan ótiwshi 95V054 “Qosjap APJ orayına” alıp barıwshı avtomobil jolınıń 0-6,2 kilometr bóleginde ońlaw jumısları baslandı.

Házirgi waqıtta joldıń gónergen asfalt qaplaması arnawlı freza texnikası járdeminde kesip alınıp, jańa asfalt qaplamasın jatqarıw jumısları ushın zárúr tayarlıq jumısları ámelge asırılmaqta.

Bul joybar joldıń transport-ekspluataciyalıq jaǵdayın jaqsılaw, háreket qáwipsizligin támiyinlew hám aymaq xalqına jáne de qolaylı sharayatlar jaratıwǵa xızmet etedi.