⚡️”Nókis – Shımbay – Taxtakópir” avtomobil jolında rekonstrukciya jumısları dawam etpekte

Búgingi kúnde Respublikamızda jol infrastrukturasın jáne de jaqsılaw, xalıq hám transport qatnawı ushın qolaylı jáne qáwipsiz sharayat jaratıw maqsetinde keń kólemli qurılıs jumısları ámelge asırılmaqta.

Atap aytqanda, Húrmetli Prezidentimizdiń 2025-jıl 27-dekabrdegi PQ-393-sanlı qararına muwapıq, Nókis qalası aymaǵınan ótiwshi D234 “Nókis – Shımbay – Taxtakópir” avtomobil jolınıń 9,3-14,3-km bóleginde rekonstrukciya jumısları izbe-iz dawam ettirilmekte.

Bul avtomobil jolı aldın 12 metr keńlikte bolǵan bolsa, rekonstrukciya jumıslarınıń juwmaǵında joldıń ulıwma keńligi 24 metrge jetkeriledi. Bul bolsa transport aǵımın sezilerli dárejede jaqsılaw, tıǵılıslardıń aldın alıw jáne aydawshı hám jolawshılar ushın jáne de qolaylı, qáwipsiz háreketleniw imkaniyatın jaratadı.

Joybar sheńberinde avtomobil jolınıń qatnaw bólegi zamanagóy talaplar tiykarında keńeytilip, jol qaplaması jańalanbaqta. Sonday-aq, piyadalar jolları, jol jaqtılandırıw sistemaları, drenaj tarmaqları hám transport háreketi qáwipsizligin támiyinlewge qaratılǵan basqa da infrastruktura obektleri qurılmaqta.

Bul rekonstrukciya jumısları aymaqtıń transport infrastrukturasın rawajlandırıw, xalıqqa jáne de qolaylı sharayat jaratıw jáne xalıqaralıq hám jergilikli qatnawlardıń nátiyjeliligin arttırıwǵa xızmet etedi.