⚡️Ámiwdárya ústinen jańa kópir qurılısı dodalandı

Búgin Qaraqalpaqstan Respublikası Avtomobil jolları Bas basqarması baslıǵı U. Matnazarov hám Ullı Britaniyalıq investor — “Valli Trading” kompaniyası direktorı Ali Saleh penen ushırasıw bolıp ótti.

Ushırasıw dawamında Ámiwdárya rayonındaǵı Jumurtaw awılın hám Qarataw posyolkasın óz-ara baylanıstıratuǵın jańa kópir qurılısı máselesi dodalandı. Tárepler bul joybar aymaqtıń infrastrukturasın jaqsılaw, transport qatnawın jeńillestiriw hám ekonomikalıq belsendilikti arttırıwda úlken áhmiyetke iye ekenin atap ótti.

Sonday-aq, rejelestirilip atırǵan kópir awır júk transportlarınıń háreketine sáykes túrde joqarı kóteriw quwatlılıǵına iye bolıwı zárúr ekenligi atap ótildi. Ushırasıwda joybar sheńberindegi imkaniyatlar, birge islesiw perspektivaları hám onı ámelge asırıw mexanizmleri boyınsha pikir alısıldı.

Bul baslama aymaqta logistika sistemasın rawajlandırıw hám sanaat potencialın jáne de keńeytiwge xızmet etiwi kútilmekte.