⚡️Ózbekstan Respublikası Transport prokurorı qurılıs jumısları menen tanıstı

Ózbekstan Respublikası Transport prokurorı I.Narimov tárepinen Qaraqalpaqstan Respublikası aymaǵında avtomobil jolları qurılısı sheńberinde ámelge asırılıp atırǵan mámleketlik baǵdarlamalardıń orınlanıwı ornına shıǵıp úyrenildi.

Dáslep, Ózbekstan Respublikası Prezidentiniń 2025-jıl 27-dekabrdegi PQ-393-sanlı “2026-2028-jıllarda Ózbekstan Respublikasınıń sociallıq hám óndirislik infrastrukturasın rawajlandırıw ilajları haqqında”ǵı qararı tiykarında A380 “Ǵuzar-Buxara-Nókis-Beynew” avtomobil jolınıń 787.5-kilometrinde qurılıp atırǵan jol ótkizgish qurılısı kózden ótkerilip, joybarlaw-smeta hújjetleri menen tanısıldı. Qurılıs jumısların joqarı sapalı dárejede alıp barıw hám obektti belgilengen múddette paydalanıwǵa tapsırıw boyınsha tiyisli tapsırmalar berildi.

Sonday-aq, usı joldıń 673—698-kilometr (25 km) bóleginde Aziya rawajlanıw bankiniń qatnasıwında ámelge asırılıp atırǵan cement-beton qaplama menen rekonstrukciyalaw jumısları da úyrenildi. Processte jumıslardıń belgilengen norma hám sapa talapları tiykarında alıp barılıp atırǵanı ayrıqsha itibar menen bahalanıp, qurılıs jumısların tastıyıqlanǵan keste tiykarında shólkemlestiriw boyınsha jumıstı bólip alıp islewshi shólkemlerge tiyisli kórsetpeler berildi.