⚡️RÁSMIY MÚNÁSIBET

Sociallıq tarmaqlarda Ellikqala, Tórtkúl, Beruniy hám Ámiwdárya rayonlarındaǵı jol infrastrukturasınıń jaǵdayı boyınsha tarqalǵan sın materiallar Avtomobil jolları sisteması juwapkerleri tárepinen úyrenip shıǵıldı.

Bul aymaqlarda bar jollardıń bir bólegi uzaq jıllar dawamında tolıq kapital ońlanbaǵan bolıp, ayırım uchastkalarda aǵımdaǵı ońlaw jumısları alıp barılǵanın atap ótiw kerek. Onda bar qarjı resursları sheńberinde, bárinen burın, jol háreketi qáwipsizligin támiyinlew maqsetinde nasaz uchastkalardı operativ saplastırıw (dúzetiw) jumısları ámelge asırılǵan.

Sonıń menen birge, tán alıw kerek, ayırım aymaqlarda jollardıń texnikalıq jaǵdayı búgingi kúnniń talaplarına tolıq juwap bermeydi. Bul baǵdardaǵı mashqalalardı sistemalı sheshiw maqsetinde 2026-jıl hám onnan keyingi dáwirler ushın aymaqlıq baǵdarlamalar islep shıǵılǵan bolıp, olarǵa muwapıq basqıshpa-basqısh kapital ońlaw hám rekonstrukciyalaw jumıslarınıń ámelge asırılıwı belgilengen.

Ministrler Kabinetiniń 342-sanlı qararınıń orınlanıwı boyınsha da tiyisli shólkemler tárepinen turaqlı monitoring jumısları alıp barılmaqta. Anıqlanǵan kemshilikler boyınsha juwapker shólkemlerge kórsetpeler berilip, olardı saplastırıw boyınsha anıq ilajlar belgilenbekte.

Sonday-aq, jol infrastrukturasına baylanıslı joybarlar sheńberinde ajıratılıp atırǵan qarjılardıń ashıq-aydınlıǵın támiyinlew, jumıstı bólip alıp islewshi shólkemlerdiń jumısın ashıq-aydın tiykarda shólkemlestiriw hám jámietlik qadaǵalawdı kúsheytiw boyınsha jumıslar dawam ettirilmekte.

Jol háreketi qáwipsizligin támiyinlew, sonıń ishinde, jol belgileri ornatıw, sızıqlardı jańalaw hám túngi jaqtılandırıw sistemaların jaqsılaw máseleleri de ayrıqsha itibarda bolıp, bul baǵdardaǵı jumıslar aymaqlar kesiminde basqıshpa-basqısh ámelge asırılmaqta.

Avtomobil jolları sistemasınıń juwapkerleri puqaralar hám jámiechilik tárepinen bildirilip atırǵan hár bir múrájat hám sın pikirlerdi itibardan shette qaldırmaydı jáne bar mashqalalardı saplastırıw boyınsha ámeliy ilajlardı izbe-iz dawam ettiredi.