⚡️RÁSMIY MÚNÁSIBET

Sociallıq tarmaqlarda tarqalǵan múrájatqa (https://t.me/ASBLOGI/959) Qaraqalpaqstan Respublikası Avtomobil jolları Bas basqarması rásmiy múnásibet bildiredi.

Avtomobil jollarında gúzgi-qısqı máwsimnen soń túrli nuqsanlardıń payda bolıwı tábiyǵıy process esaplanadı. Ásirese, Qaraqalpaqstan Respublikasınıń keskin kontinental klimatı, qıs máwsiminde temperaturanıń keskin tómenlewi, muzlaw hám eriw processleriniń tez-tez qaytalanıwı, samal hám ıǵallıq faktorları jol qaplamasına unamsız tásir kórsetedi. Nátiyjede ayırım aymaqlarda asfalt-beton qaplamada jarıqlar, shógiwler hám oyıqlar payda bolıwı múmkin.

Bul kemshiliklerdi saplastırıw boyınsha aymaqlarda úyreniw jumısları alıp barılıp, anıqlanǵan kemshiliklerdi qısqa múddetlerde tiklew ilajları kórilmekte. Házirgi kúnde aǵımdaǵı ońlaw hám tiklew jumısları baslap jiberilgen bolıp, belgilengen grafik tiykarında basqıshpa-basqısh ámelge asırılmaqta.

Qaraqalpaqstan Respublikası aymaǵında avtomobil jolı infrastrukturasın jaqsılaw, bar jollardı ońlaw hám rekonstrukciyalaw jumısları tastıyıqlanǵan baǵdarlamalar tiykarında basqıshpa-basqısh ámelge asırılmaqta. Atap aytqanda, 2026-jıl dawamında ulıwma paydalanıwdaǵı avtomobil jollarınıń 300 kilometrden aslam bólegi ońlanıwı, sonday-aq, 24 kópirdi qayta qurıw jumıslarınıń orınlanıwı rejelestirilgen.

Bunnan tısqarı, ishki xojalıq avtomobil jollarında 2026-jılı 757,3 kilometr uzınlıqtaǵı jollarda jámi 311,4 milliard sumlıq qurılıs-ońlaw jumıslarınıń alıp barılıwı belgilengen. Sonıń ishinde, “Open byudjet”tiń 2025-jıl 2-máwsimi sheńberinde 2026-jılǵa ótetuǵın 17,4 kilometr uzınlıqtaǵı 23,2 milliard sumlıq ońlaw jumısları rejelestirilip, orınlawshı kárxanalar menen qosımsha kelisimler dúzilgen hám búgingi kúnde qurılıs jumısları juwmaqlanıw basqıshında. “Open byudjet” sheńberinde bolsa 2026-jıl 255 kilometr uzınlıqtaǵı avtomobil jollarında 169,5 milliard sumlıq ońlaw jumıslarınıń ámelge asırılıwı názerde tutılǵan. Sonday-aq, PQ-330-sanlı “Kámbaǵallıqtan abadanlıqqa qaray” baǵdarlaması sheńberinde 154,5 kilometr ishki jollar ushın 43,9 milliard sum qarjı ajıratılıwı belgilengen bolıp, házirgi waqıtta qarjılandırıw processleri alıp barılmaqta.

Keleshekte xalıqaralıq finans institutlarınıń qatnasıwında iri infrastrukturalıq joybarlardı ámelge asırıw rejelestirilgen. Ministrler Kabinetiniń 2024-jıl 14-fevraldaǵı 92-sanlı qararına muwapıq A-380 “Ǵuzar-Buxara-Nókis-Beynew” avtomobil jolınıń 765-806 kilometr (41 km) bólegi, yaǵnıy Nókis qalası, Taqıyatas hám Xojeli rayonları aymaǵınan ótiwshi uchastkaları cement-beton qaplama menen qayta qurıladı. Joybardıń bahası 180 million AQSh dolların qurap, 2026-2029-jıllarda ámelge asırıladı. Bul joybar sheńberinde 8 kópir rekonstrukciyalanadı, suw ótkeriw imaratları ornatıladı hám 185 kiriw-shıǵıw jolları qurıladı. Bul joybar transport-logistika sistemasın jaqsılaw hám aymaqta ekologiyalıq turizmdi rawajlandırıwǵa xızmet etedi.

Sonday-aq, Ózbekstan Respublikası Prezidentiniń 2021-jıl 30-dekabrdegi PP-72 hám 2023-jıl 10-oktyabrdegi PP-330-sanlı qararlarına tiykarlanıp Qaraqalpaqstan Respublikasında 328,1 kilometr jergilikli áhmiettegi avtomobil jolların tolıq ońlaw belgilengen bolıp, joybar bahası 149,1 million AQSh dolların quraydı hám 2025-2029-jıllarda ámelge asırıladı. Prezidenttiń 2022-jıl 18-maydaǵı PQ-249-sanlı hám Ministrler Kabinetiniń 2022-jıl 27-dekabrdegi 723-sanlı qararlarına muwapıq bolsa 2026-jıldan baslap 62 kilometr jergilikli áhmiettegi avtomobil jolları cement-beton qaplama menen qayta qurılıwı rejelestirilgen bolıp, joybardıń bahası 18,5 million AQSh dolların quraydı hám 2026-2028-jıllarda ámelge asırıladı.

Qaraqalpaqstan Respublikası Avtomobil jolları bas basqarması aymaqtaǵı jol infrastrukturasın ele de jaqsılaw boyınsha jumıslardı izbe-iz dawam ettiredi hám puqaralardıń múrájatları turaqlı túrde úyrenip barıladı.