⚡️Qaraózek rayonında ishki jollar jańalanıwı xalıqqa qolaylıq jarattı

Qaraózek rayonınıń “Jańa Qaraózek” posyolka puqaralar jıyını aymaǵındaǵı Bozataw, Paraxatshılıq hám Gerbish zavod kóshelerine 1 kilometr 920 metr uzınlıqta asfalt tósew jumısları ámelge asırıldı. Bul jumıslar “Baslamalı budjet” baǵdarlamasınıń 2025-jıl 2-máwsiminde jeńimpaz bolǵan joybar tiykarında alıp barıldı.

Joybardıń tiykarǵı maqseti – máhálle xalqı ushın qolaylı háreketleniw imkaniyatın jaratıw, ishki jollardıń jaǵdayın jaqsılaw hám transport qatnawın qáwipsiz jáne qolaylı etiw bolıp esaplanadı. Bul baslama arqalı xalıqtıń tikkeley qatnasıwında áhmiyetli sociallıq másele sheshildi.

Jol qurılısı jumısları Qaraqalpaqstan Respublikası Aymaqlıq jollarǵa buyırtpashı xızmeti mámleketlik shólkemi buyırtpası tiykarında “Doniyor Avto Servis” JShJ tárepinen asfalt tósew jumısları orınlandı. Nátiyjede máhálledegi ishki jollar jańalandı, shań-tozań mashqalası saplastırıldı hám xalıqtıń kúndelikli turmısında qolaylıq jaratıldı.