⛈ Gúz-qıs máwsimine tayarlıq jumısları úyrenildi

Ózbekstan Respublikası Transport ministrligi janındaǵı Transport qadaǵalaw inspekciyasınıń baslıǵı Jamshid Karimov hám Qaraqalpaqstan Respublikası Avtomobil jolları bas basqarmasınıń baslıǵı Umrbek Matnazarov basshılıǵındaǵı jumısshı topar tárepinen basqarma sistemasındaǵı rayonlıq Jollardan paydalanıw mámleketlik shólkemleriniń gúz-qıs máwsimine tayarlıq processleri orınlarǵa shıqqan halda úyrenildi.

Sapar dawamında jol bólimlerindegi ońlaw jumıslarınıń sapası, jolshılar ushın jaratılǵan sharayatlar, qum-duz rezervleriniń jaǵdayı hám texnikalardıń tayarlıq dárejesi kózden ótkerildi. Sonday-aq, rayonlıq jol shólkemleriniń texnika hám mexanizmleriniń texnikalıq jaǵdayı, janılǵı-maylaw ónimleriniń rezervi, qar tazalaw hám muzǵa qarsı sebiw materialları menen támiyinlengenlik dárejesi de hár tárepleme úyrenildi.

Sonıń menen birge, hár qanday hawa-rayı sharayatında jol háreketi qáwipsizligin támiyinlew, avtotransport qurallarınıń háreketinde úzilislerge jol qoymaw, sonday-aq, xalıqqa qolaylı sharayat jaratıw maqsetinde ámelge asırılıp atırǵan jumıslar dodalandı.

Bul ilajdıń tiykarǵı maqseti — gúz-qıs máwsimde jollardan úzliksiz hám qáwipsiz paydalanıwdı támiyinlew, sonday-aq, taraw xızmetkerleriniń tayarlıq dárejesin ámelde tekseriwden ibarat.