“Qaraqalpaqstan Respublikası xalqın sociallıq qollap-quwatlaw hám fizikalıq shaxslar tárepinen qurılǵan turaq-jaylarǵa bolǵan huqıqlardı tán alıw haqqında” Ózbekstan Respublikası Prezidentiniń Pármanı

Ózbekstan Respublikası Konstituciyasınıń 47-statyasına muwapıq Qaraqalpaqstan Respublikasında xalıqtıń turaq-jayǵa bolǵan huqıqı ámelge asırılıwı ushın sharayatlar jaratıw, fizikalıq shaxslar tárepinen qurılǵan kóshpes múlk obektlerine bolǵan huqıqlardı tán alıw arqalı xalıqtı sociallıq qollap-quwatlaw maqsetinde:

1. Qaraqalpaqstan Respublikası aymaǵında:

Ózbekstan Respublikası Ministrler Kabinetiniń 2016-jılı 3- avgusttaǵı «2016-2017-jıllar dawamında fizikalıq hám yuridikalıq tárepleme tiyisli bolǵan kóshpes múlk obektlerin jalpı xatlawdan ótkeriw haqqında»ǵı 251-san qararına tiykar huqıq belgilewshi hújjetlersiz 71 987 turaq jayǵa bolǵan huqıqlar aytılǵanı;

Ózbekstan Respublikası Prezidentiniń 2018-jılı 20-apreldegi «Puqaralardı sociallıq qollap-quwatlaw boyınsha qosımsha ilajlar hám ózbasımshalıq penen qurılǵan turaq jaylarǵa salıstırǵanda múlk huqıqın kórsetiw boyınsha bir mártelik ulıwma mámleketlik akciyasın ótkeriw haqqında»ǵı PP-5421-san Pármanına tiykar huqıq belgilewshi hújjetlersiz 50 361 turaq-jayǵa bolǵan huqıqlar aytılǵanı;

Qaraqalpaqstan Respublikası Ministrler Keńesiniń maǵlıwmatlarına bola, joqarıdaǵı qarar hám Párman sheńberinde huqıq tán alınbaǵan qosımsha 43 432 turaq-jaylar bar ekeni maǵlıwmat ushın qabıllansın.

2. Qaraqalpaqstan Respublikası Joqarǵı Keńesiniń Qaraqalpaqstan Respublikası aymaǵında puqaralardıń huqıq belgilewshi hújjetlersiz qurılǵan turaq-jayları jaylasqan jer uchastkasına ijara huqıqın, onda jaylasqan imaratlarǵa múlk huqıqın tán alıw haqqındaǵı usınısı qollap-quwatlansın. Bunda:
3. a) jer uchastkasına ijara huqıqı hám imaratlarǵa múlk huqıqın tán alıw ushın:

puqara bul turaq-jaydan 2018-jılı 1-mayǵa shekem bolǵan dáwirden baslap óziniki sıyaqlı halal, áshkara hám úzliksiz paydalanǵan bolıwı, bul jaǵday kosmoslıq súwretlerdi qayta islew arqalı hám sońǵı bes jıl ushın jer salıǵı hám mal-múlk salıǵı tólengeni menen tastıyıqlanǵan bolıwı;

huqıqtı tán alıw basqa táreplerdiń huqıqları hám nızam menen qorǵalatuǵın máplerin buzbawı;

jer uchastkası bos bolmawı, onda qurılǵan turaq-jay jasaw ushın mólsherlengen bolıwı, puqaralardıń ómiri hám densawlıǵına qáwip tuwdırmawı;

jer uchastkası suwǵarılatǵın jerler, qorǵalatuǵın tábiyǵıy aymaqlar, tariyxıy-mádeniy áhmiyetke iye jerler, transport, baylanıs hám qorǵanıw maqsetlerine mólsherlengen jerler, ximiyalıq yaki radioaktiv elementler menen pataslanǵan jerler kategoriyasına kirmewi, suw obektleriniń sanitariya qáwipsizligi zonalarında, jer ústi hám jer astı suwlarınıń payda bolıw zonalarında jaylaspaǵan bolıwı shártligi;

1. b) jer uchastkasına ijara huqıqı 1998-jılı 30-aprelge shekem iyelengen jerler ushın — 0,24 gektarǵa shekem, 1998-jılı 1-maydan 2018-jılı 1-mayǵa shekem iyelengen jerler ushın — 0,06 gektarǵa shekem kólemde kórsetiliwi;
2. v) turaq-jay iyeleri hám rayon (qala) hákimi arasında jer uchastkası ijarası shártnamasın dúziw talap etilmewi;
3. g) bul bánt sheńberine túspeytuǵın yaki belgilengen kólemnen artıqsha jer uchastkaları rezervke qaytarılıwı, olardı beriw (realizaciyalaw) Jer kodeksinde belgilengen tártipte ámelge asırılıwı esapqa alınsın.
4. Belgilansin, bul Pármanǵa muwapıq huqıqlardı atap ótiw xalıq deputatları rayonlıq (qalalıq) Keńesleriniń qararları menen tastıyıqlanǵan turaq-jaylar dizimine muwapıq Qaraqalpaqstan Respublikası Joqarǵı Keńesi qararı menen rásmiylestiriledi. Bunda:

talabanlar hám (yaki) shegaralas jer uchastkaları iyeleri arasında kelispewshilik bar bolǵan jaǵdaylarda, xalıq deputatları rayon (qala) Keńesleriniń qararları kelispewshilik sheshilgennen keyin qabıllanadı;

xalıq deputatları rayon (qala) Keńesleri tárepinen bul bántke tiykar qararlar qabıl etiw hám olarǵa ózgeris hám qosımshalar kirgiziwdiń aqırǵı múddeti — 2024-jılı 1-avgust sánesi esaplanadı;

xalıq deputatları rayon (qala) Keńesleri hám Qaraqalpaqstan Respublikası Joqarǵı Keńesiniń bul bántte názerde tutılǵan qararları tiyisli ádillik uyımında huqıqıy ekspertizadan ótkerilgennen keyin qabıllandı hám rásmiy járiyalanǵannan keyin kúshke kiredi.

4. Tómendegiler Qaraqalpaqstan Respublikası Ministrler Keńesine:

Kadastr agentligi — bir hápte múddette óziniń elektron maǵlıwmatlar bazasına kirgizilgen turaq-jaylar dizimin rayonlar hám qalalar kesiminde;

«Ózbekkosmos» agentligi — Qaraqalpaqstan Respublikası Ministrler Keńesi menen kelisilgen grafik tiykarında aymaqlardıń 2018-jıl 1-mayǵa shekemgi bolǵan jaǵdayına kosmik súwretlerin qayta islew nátiyjesinde alınǵan maǵlıwmatlardı;

Salıq komiteti — eki ay múddette Kadastr agentliginiń elektron maǵlıwmatlar bazasına kirgizilgen turaq-jaylar arasınan sońǵı bes jıl ushın jer salıǵı hám mal-múlk salıǵı tólengen turaq-jaylar haqqındaǵı maǵlıwmatlardı;

mámleketlik kadastrlardı júritiwge juwapker bolǵan ministrlik, uyım hám shólkemler – eki ay múddette ózlerine biriktirilgen aymaqta jaylasqan, bul Pármannıń 2-bánti «a» kishi bántine muwapıq huqıq tán alınıwı lazım bolmaǵan turaq-jaylar haqqındaǵı maǵlıwmatlardı usınsın.

5. Qaraqalpaqstan Respublikası Joqarǵı Keńesine bul Pármandı ámelge asırıw boyınsha shólkemlestirilgen ilajlardı belgilew, atap aytqanda:

Qaraqalpaqstan Respublikası, rayonlar hám qalalar boyınsha isshi toparlar shólkemlestiriw;

huqıq belgilenlegi ushın bir mártelik jıyım engiziw, onnan túsken qárejetlerdi sarıplaw baǵdarların belgilew;

bul Pármandı ámelge asırıw boyınsha xárejetler ushın, atap aytqanda, «Sociallıq qorǵaw birden-bir reestri» málimleme sistemasında dizimge alınǵan puqaralarǵa kómeklesiw, kosmik súwretlerdi qayta islew ushın Qaraqalpaqstan Respublikasınıń respublika byudjeti, rayonlar hám qalalar byudjetleri, bir mártelik jıyımnan túsken pullardı baǵdarlaw wákilligi berilsin.

6. Qaraqalpaqstan Respublikası Ministrler Keńesi bul Párman orınlanıwı juwmaqlarına bola 2024-jılı 1-avgustqa shekem awıl xojalıǵına mólsherlengen suwǵarılmaytuǵın jerler hám toǵay qorı jerleriniń jer qorı kategoriyasın elatlı punktleriniń (qalalar, posyolkalar hám awıl elatlı punktleriniń) jerleri kategoriyasına ótkeriw boyınsha usınıslardı belgilengen tártipte kiritsin.
7. Bas prokuratura Párman orınlanıwın shólkemlestiriwde nızamshılıqtı támiyinlew boyınsha qatań baqlaw ornatsın.
8. Bul Pármannıń orınlanıwın nátiyjeli shólkemlestiriwge juwapker etip Qaraqalpaqstan Respublikası Ministrler Keńesi Baslıǵı F.U. Ermanov belgilensin.
9. Bul Pármannıń orınlanıwın baqlaw Ózbekstan Respublikası Bas ministri A.N. Aripov moynına júklensin.

Ámelge asırılǵan jumıslar haqqında 2024-jılı 1-sentyabrge shekem Ózbekstan Respublikası Prezidentine málimleme berilsin.

Ózbekstan Respublikası Prezidenti Sh. MIRZIYOEV

Tashkent q.,

2023-jılı 28-iyul,

PP-119-san