⚡️RASMIY MUNOSABAT

Ijtimoiy tarmoqlarda tarqalgan murojaatlarga (https://www.instagram.com/reel/DL2AbpZICXu/?igsh=MTQweGMyaGZ6Z2k5Ng==) (https://t.me/Turtkul24news/7444) Qoraqalpog‘iston Respublikasi Avtomobil yo‘llari bosh boshqarmasi rasmiy munosabat bildiradi.

Videomurojaatda Ellikqal’a tumani hududidagi A380 avtomobil yo‘li ustidagi ko‘prikda transport harakati yopilishi oqibatida tashkil etilgan aylanma yo‘l bo‘ylab chang ko‘tarilishi, aholi uchun noqulaylik tug‘dirayotgani ta’kidlangan.

Mazkur ko‘prik A-380 “Gʻuzor–Buxoro–Nukus–Beyneu” avtomobil yoʻlining 607,9-kilometr (17-piket) qismida joylashgan bo‘lib, 1972-yilda qurilgan. O‘tgan yillar davomida tabiiy omillar, sho‘rlanish va og‘ir yuk tashuvchi transport vositalari sonining ortishi natijasida ko‘prik avariya holatiga kelib qolgan.

Shu sababli, 2025-yil 7-martdan boshlab ko‘prikda transport harakati to‘xtatilib, aylanma yo‘l tashkil etildi. Bu qaror, eng avvalo, fuqarolar hayoti va xavfsizligini ta’minlash maqsadida qabul qilingan.

Yuqorida keltirilgan vaziyatni yumshatish va aholi salomatligiga salbiy ta’sirlarning oldini olish maqsadida 1 dona suv sepuvchi maxsus texnika (vodavoz) jalb etilgan bo‘lib, ushbu yo‘lda muntazam suv sepish ishlari olib borilmoqda.

Bundan tashqari, ijtimoiy tarmoqlarning birida mazkur ko‘prik qurilishi joyida ogohlantiruvchi yo‘l belgilarining yo‘qligi haqida xabar tarqalgan.

Shuni ma’lum qilamizki, ko‘prikda qurilish ishlari boshlanishidan avval, harakat xavfsizligini ta’minlash maqsadida Qoraqalpog‘iston Respublikasi Yo‘l harakati xavfsizligi boshqarmasi bilan kelishilgan holda, aylanma yo‘l tashkil etilgan va qurilish jarayonlari boshlanishidan oldin quyidagi xavfsizlik vositalari hamda yo’l belgilari o‘rnatilgan:

• ogohlantiruvchi yo‘l belgilari;
• axborot bannerlari;
• miltillovchi chiroqlar;
• tungi yoritgich chiroqlari.

Bu choralar fuqarolarning xavfsiz va xabardor holda harakatlanishini ta’minlashga qaratilgan bo‘lib, tegishli tartibda amalga oshirilganini alohida ta’kidlaymiz. Hozirda eski ko‘prikni demontaj qilish (buzish) ishlari yakunlangan bo‘lib, yaqin kunlarda yangi ko‘prik qurilishi boshlanishi rejalashtirilgan.

Hurmatli fuqarolar!

Yaratilgan vaqtinchalik noqulayliklar uchun Sizlardan chuqur uzr so‘raymiz. Ishonchimiz komilki, olib borilayotgan har bir ish – Sizlarning xavfsiz, qulay va barqaror harakatlanishingiz uchun amalga oshirilmoqda.

🏢Qoraqalpog‘iston Respublikasi Avtomobil yo‘llari bosh boshqarmasi matbuot xizmati