⚡️Qoraqalpog‘iston Respublikasi Transport vazirligi, Transport nazorati inspeksiyasi va Qoraqalpog‘iston Respublikasi Avtomobil yo‘llari bosh boshqarmasi hamkorligida matbuot anjumani hamda Press-tur tashkil etildi

Matbuot anjumanidan so‘ng Press-tur davomida jurnalistlar mobil tarozi punktlarida olib borilayotgan reyd tadbirlarida ishtirok etdi. Mazkur tadbir doirasida yuk avtomobillarining belgilangan og‘irlik me’yorlariga rioya qilinishi holati nazorat qilinib, transport vositalarining texnik holati va xavfsizlik talablariga muvofiqligi o‘rganildi.

Shuningdek, Transport nazorati inspeksiyasi Avtomobil va suv transportida nazorat Qoraqalpog‘iston Respublikasi hududiy bo‘limi va YPX inspektorlari bilan birgalikda reyd tadbirlari olib borildi. Yo‘l harakati qoidalarida yo‘lovchi tashishga oid belgilangan talablarga rioya etmasdan, belgilangan me’yorlarni buzgan haydovchilarga nisbatan tegishli chora ko‘rilishi yuzasidan jurnalistlar tomonidan ish jarayoni ko‘zdan kechirildi.

Press-tur doirasida Hurmatli Prezidentimizning 2024-yil 24-dekabr kungi «2025 — 2027-yillarda O‘zbekiston Respublikasining ijtimoiy va ishlab chiqarish infratuzilmasini rivojlantirish choralari to‘g‘risida»gi PQ-454-sonli qarori asosida D234 (4R176) “Nukus–Chimboy–Taxtako‘pir” avtomobil yo‘lining 6–7-kilometr qismida olib borilayotgan rekonstruksiya ishlari bilan bevosita tanishildi. Obyektni ko‘zdan kechirish chog‘ida asfalt qoplamasining sifati, yo‘l qurilishida qo‘llanilayotgan texnologiyalar va me’yoriy hujjatlarga muvofiqligi, laboratoriya sinovlari jarayonlari haqida atroflicha ma’lumotlar taqdim etildi.

Ushbu tadbirlar transport sohasida ochiqlik va shaffoflikni ta’minlash, keng jamoatchilikni yo‘l infratuzilmasini rivojlantirish borasidagi ishlar bilan yaqindan tanishtirish, mavjud muammolarni joyida ko‘rib chiqish va ularni hal etish yo‘llarini aniqlashda muhim ahamiyat kasb etdi.