⚡️Nókis aylanba jolında ońlaw jumısları dawam etpekte

Nókis qalası aymaǵınan ótiwshi D234 (4R176V) “A380 avtomobil jolına shıǵıw jolı” avtomobil jolınıń 0-3-kilometr bóleginde asfalt tósew jumısları ámelge asırılmaqta.

Ońlaw jumısları Qarataw Jollardan turaqlı paydalanıw mámleketlik shólkemi tárepinen orınlanbaqta. Bul jol mámleketlik áhmiyetke iye bolıp, Nókis qalasın aylanıp ótiwde ornı ayrıqsha.

Bul jol arqalı Kegeyli, Shımbay, Qaraózek hám Taxtakópir rayonlarına jol alǵanlar qala ishine kirmesten háreketlene aladı. Bul bolsa waqıttı únemlew, sonday-aq, Nókis qalasındaǵı transport tıǵılısların azaytıwǵa xızmet etedi.

Jol, ásirese, rayonlardan eksport etilip atırǵan ónimlerdi tasıytuǵın júk avtomobilleri ushın qolaylıq jaratadı. Ol arqalı A380 avtomobil jolına shıǵıw imkaniyatı ashıladı hám bul Respublikanıń basqa aymaqlarına tez hám nátiyjeli jetip barıwdı támiyinleydi.