Qaraqalpaqstanda Tórtkól – Ellikqala – Beruniy aylanba jolı qurıladı

Aziya rawajlanıw banki Qaraqalpaqstan jolların modernizaciyalaw ushın $230 mln dollardan artıq qarjı ajıratadı

Aziya rawajlanıw banki (ARB) Transkaspiy xalıqaralıq transport koridorınıń (Orta koridor) áhmiyetli bólegin modernizaciyalaw ushın Ózbekstanǵa 233,1 mln dollar qarız ajıratıwdı maqulladı. (https://www.adb.org/uz/news/adb-supports-strategic-road-upgrade-uzbekistan)

Orta joldıń turaqlılıǵın arttırıw hám modernizaciyalaw joybarı Qaraqalpaqstan Respublikasındaǵı «Ǵuzar – Buxara – Nókis – Beynew» (A380) avtomobil jolınıń derlik 87 km bólegin rekonstrukciyalawdı názerde tutadı. Joybar sheńberinde 75 km uzınlıqtaǵı jańa aylanba jol («Tórtkúl – Ellikqala – Beruniy») qurılısı hám bar bolǵan A380 avtomobil jolınıń 12 km bólegin qayta qurıw rejelestirilgen.

Joybar klimatqa shıdamlı sheshimlerdi, sonıń ishinde, cement-beton qaplamalar, biyik kótermeler hám jetilistirilgen drenaj sistemaların engiziwdi názerde tutadı. Bul bolsa, klimat tásiri hám ekstremal hawa-rayı sharayatlarına shıdamlılıqtı arttıradı.

Bul investiciya Ózbekstannıń regionallıq tranzit orayı sıpatındaǵı ornın bekkemleydi hám Qaraqalpaqstanda inklyuziv ekonomikalıq ósiwdi qollap-quwatlaydı. Klimatqa shıdamlı infrastruktura hám aqıllı transport sistemaların qollanıw arqalı joybar uzaq múddetli turaqlılıqtı támiyinlewge xızmet etedi, sonıń menen birge, xalıq hám isbilermenler ushın qáwipsiz hám nátiyjelirek háreket etiw imkaniyatın jaratadı.

Sonday-aq, joybarda jol boylap bes dem alıw hám xızmet kórsetiw ornı shólkemlestiriliwi názerde tutılǵan. Olarda, sonıń ishinde, elektromobillerdi quwatlaw shaqapshaları jáne hayal-qızlar ushın qáwipsiz hám qolaylı sharayatlar jaratıladı.

Joybardıń ulıwma bahası 293,7 million dollardı qurap, Ózbekstan húkimeti 60,6 million dollar muǵdarında úles qosadı.