⚡️Ózbekstan Respublikası Transport ministriniń birinshi orınbasarı Nókis qalasında isbilermenler menen ushırastı

Ózbekstan Respublikası Transport ministriniń birinshi orınbasarı M. Omarovtıń qatnasıwında Nókis qalasında isbilermenler menen ushırasıw ótkerildi.

Ushırasıw Transport-logistika hám infrastruktura baǵdarı boyınsha shólkemlestirilip, onda Qaraqalpaqstan Respublikası Transport ministri P. Qayıpbekov, Qaraqalpaqstan Respublikası Avtomobil jolları bas basqarması baslıǵı U. Matnazarov ta qatnastı.

Ilajda bir qatar isbilermenler qatnasıp, ózlerin qızıqtırıp atırǵan hám olardı qıynap kiyatırǵan máseleler boyınsha sorawlar menen múrájat etti. Sorawlarǵa juwapker basshılar tárepinen hár tárepleme juwaplar berildi, mashqalalardı ornında sheshiw boyınsha usınıslar bildirildi.

Ushırasıw dawamında transport-logistika tarawın rawajlandırıw, aymaqlar arasındaǵı transport baylanısların jaqsılaw, júk tasıw processlerin jedel hám nátiyjeli shólkemlestiriw, jol infrastrukturasın modernizaciyalaw hám isbilermenlik jumısı ushın qolaylı sharayat jaratıw máseleleri dodalandı.

Sonday-aq, keleshekte bul baǵdardaǵı birge islesiwdi keńeytiw, jergilikli islep shıǵarıwshılar hám eksportyorlar ushın logistika qárejetlerin azaytıw, jańa infrastrukturalıq joybarlardı ámelge asırıw boyınsha rejeler belgilep alındı.