⚡️Shomanay rayonında D235 avtomobil jolınıń 22 kilometrlik bólegi jańalanbaqta

Húrmetli Prezidentimizdiń 2026-jıl 21-fevraldaǵı PQ-70-sanlı “Qaraqalpaqstan Respublikasın 2026-jılda sociallıq-ekonomikalıq rawajlandırıw hám kelesi jıllarǵa mólsherlengen baǵdarlamalardı tastıyıqlaw haqqında”ǵı qararı tiykarında Shomanay rayonı aymaǵınan ótiwshi D235 (4R177) “Qanlıkól” temir jol bándirgisi – Shomanay qalası – “Qarabaylı” temir jol bándirgisi avtomobil jolınıń 45-67-kilometr bóleginde jańadan qara qaplamalı asfalt tósew jumısları belgilengen.

Házirgi waqıtta Shomanay rayonı Jollardan paydalanıw mámleketlik shólkemi tárepinen usı avtomobil jolınıń 45-47-kilometrinde asfalt tósew jumısları alıp barılmaqta. Qurılıs jumısları dawamında zamanagóy texnika hám mexanizmlerden nátiyjeli paydalanılmaqta.

Bul joybar tolıq juwmaqlanǵannan soń, avtomobil jolınıń 22 kilometrlik bólegi jańalanıp, aymaq turǵınları ushın jáne de qolaylı hám qáwipsiz háreketleniw sharayatı jaratıladı. Eń áhmiyetlisi, xalqımızdıń uzaǵı jaqın, awırı jeńil bolıwına xızmet etedi.