⚡️RÁSMIY MÚNÁSIBET

Sociallıq tarmaqlarda tarqalǵan videomúrájatqa (https://t.me/antikorruz/1260) Qaraqalpaqstan Respublikası Avtomobil jolları bas basqarması rásmiy múnásibet bildiredi.

Videoda súwretlengen jaǵday kúshli sel aǵısı nátiyjesinde júzege kelgen bolıp, ol A380 “Ǵuzar-Buxara-Nókis-Beynew” avtomobil jolınıń Qarataw aymaǵınan ótiwshi ayırım uchastkalarında, sonday-aq, D239 avtomobil jolınıń (A380 avtomobil jolınıń 661-km bólegi) Qızılqala awılı – Bostan qalası – Gúldursun awılı – Tórtkúl qalası jónelisiniń 9-10-kilometr aralıǵında joldıń oń tárepindegi jol shetiniń sel tásirinde juwılıwı menen baylanıslı.

Bul jaǵday júzege keliwi menen jol xızmetkerleri jedellik penen waqıya ornına jetip barıp, operativ ilajlar kórdi. Atap aytqanda, sel aǵısınıń avtomobil jolına zıyan jetkeriwiniń aldı alınıp, suw ótkeriwshi qubırlar arqalı suwdıń erkin aǵıp ketiwi támiyinlendi hám qáwipli aymaqlarda zárúr jumıslar ámelge asırıldı.

Házirgi kúnde bul uchastkalarda sel aqıbetinde zıyanlanǵan jol shetlerin tiklew, bekkemlew hám jol infrastrukturasın normal jaǵdayǵa keltiriw jumısları tolıq juwmaqlandı.

Málim etemiz, Tórtkúl rayonına alıp barıwshı avtomobil jolları tiykarınan eki jóneliste shólkemlestirilgen bolıp, olar:
– A380 “Ǵuzar-Buxara-Nókis-Beynew” avtomobil jolı;
– D239 avtomobil jolı (Qızılqala awılı – Bostan qalası – Gúldursun awılı – Tórtkúl qalası jónelisi) esaplanadı.

Bul jollarda turaqlı túrde ońlaw hám saqlaw jumısları alıp barılmaqta.

Sonıń menen birge:

– avtomobil jolınıń 673-698-km bóleklerinde xalıqaralıq standartlarǵa muwapıq cement-beton qaplama menen rekonstrukciyalaw jumısları;

– 698-723-km bólimlerinde bolsa qurılıs jumısları ámelge asırılmaqta.

Sonday-aq, avtomobil jolınıń 581-673-km bólegin (Tórtkúl, Ellikqala, Beruniy rayonları aymaǵı) rekonstrukciyalaw joybarın Ózbekstan Respublikası Prezidentiniń 2022-jıl 31-avgusttaǵı PP-213-sanlı Pármanına tiykarlanıp Aziya rawajlanıw bankiniń qatnasıwında ámelge asırıw belgilengen bolıp, bul jumıslardı jaqın múddetlerde baslaw rejelestirilgen.

Sonı ayrıqsha atap ótiw kerek, avtomobil jollarınıń jaǵdayı tek ǵana bir lawazımlı shaxstıń jumısı menen emes, al uzaq jıllar dawamında qáliplesken infrastruktura, ajıratılıp atırǵan qarjılardıń kólemi hám tábiyǵıy-klimat sharayatları sıyaqlı bir qatar faktorlar menen tıǵız baylanıslı.

Húrmetli puqaralar, bar mashqalalar basqıshpa-basqısh saplastırılmaqta hám jol infrastrukturasın jaqsılaw jumısları izbe-iz dawam ettiriledi.