⚡️Kópir hám jasalma qurılmalar texnikalıq kórikten ótkerilmekte

Qaraqalpaqstan Respublikası aymaǵındaǵı ulıwma paydalanıwdaǵı avtomobil jolları hámde elatlı punktler kóshelerinde jaylasqan kópir hám jasalma qurılmalardı texnikalıq tekseriwden ótkeriw jumısları izbe-iz dawam etpekte.

Bul ilajlar Ózbekstan Respublikası Avtomobil jolları komitetiniń 2026-jıl 19-marttaǵı 19-sanlı buyrıǵınıń orınlanıwın támiyinlew maqsetinde shólkemlestirilmekte. Oǵan bola, qurılǵan, rekonstrukciyalanǵan hám ońlanǵan barlıq kópir qurılmaları basqıshpa-basqısh úyrenilmekte.

Usı sheńberde “O‘zyo‘lko’pirik” klasteri mámleketlik mákemesi direktorı orınbasarı A.Abdullaev, Basqarma baslıǵı U.Matnazarov hám Qaraqalpaqstan Respublikasında shólkemlestirilgen jumısshı topardıń qatnasıwında orınlarǵa shıǵıp úyreniw jumısları alıp barıldı.

Atap aytqanda, A380 “Ǵuzar-Buxara-Nókis-Beynew” avtomobil jolınıń 746-kilometrinde jaylasqan kópir hám D234B avtomobil jolınıń 2-3-kilometr aralıǵındaǵı kópir qurılmaları tikkeley kózden ótkerildi.

Úyreniw procesinde bar kemshilikler menen mashqalalar anıqlanıp, olardı qısqa múddetlerde saplastırıw boyınsha juwapkerlerge tiyisli tapsırmalar berildi.

Bul texnikalıq tekseriw jumısları jol infrastrukturasınıń qáwipsizligi hám isenimliligin támiyinlew, sonday-aq, xalıqqa qolaylı hám qáwipsiz háreketleniw sharayatların jaratıwǵa xızmet etetuǵının atap ótiw orınlı.