⚡️RÁSMIY MÚNÁSIBET

Nókis qalası aymaǵınan ótiwshi D234 (4R176A) “Nókis temir jol vokzalı”na alıp barıwshı (A. Dosnazarov kóshesi) avtomobil jolınıń 9 -10-km bóleginde kanalizaciya qubırlarında júzege kelgen avariyalıq jaǵday sebepli joldı ekige ajıratıwshı bólegi aralıǵında jarıqlar baqlandı.

Bul jaǵday kúni keshe Qaraqalpaqstan Respublikası Avtomobil jolları Bas basqarması tárepinen operativ qadaǵalawǵa alınıp, qáwipsizlikti támiyinlew maqsetinde avtomobil jolınıń bir bólegi waqtınsha jabıldı hám tiyisli jol belgileri ornatıldı.

Házirgi waqıtta juwapker shólkemler tárepinen avariya aqıbetlerin saplastırıw hám jol qatnaw bólegin tiklew boyınsha zárúr jumıslar alıp barılmaqta.

Usı múnásibet penen, barlıq aydawshılardan ornatılǵan jol belgileri hám háreket qáwipsizligi qaǵıydalarına qatań ámel etiwi soraladı.

Sonday-aq, sociallıq tarmaqlarda (https://t.me/Kar24Uz/51991) D234 “Nókis-Shımbay-Taxtakópir” avtomobil jolınıń 4-5-km bóleginde, yaǵnıy Nókis diyqan bazarı aldında alıp barılıp atırǵan ońlaw jumısları boyınsha sın pikirler bildirilmekte.

Bul uchastkada ońlaw jumısları sheńberinde jol qaplaması freza úskenesi járdeminde kesilgen. Biraq hawa-rayınıń keskin ózgeriwi, atap aytqanda jawın-shashın sebepli frezalangan bólimge asfalt qaplamasın tósew imkaniyatı bolmagan. Hámmemizge belgili, jawın-shashınlı sharayatta asfalt qaplamasın tósew texnikalıq norma hám talaplarǵa juwap bermeydi.

Sol sebepli ońlaw jumısları waqtınsha toqtatılǵan bolıp, júzege kelgen qolaysızlıqlar ushın keshirim soraymız. Hawa-rayı sharayatı jaqsılanǵannan soń, bul uchastkada ońlaw jumısları tolıq juwmaqlanatuǵının málim etemiz.