⚡️Ellikqalada jańa jol ótkizgish paydalanıwǵa tapsırıldı

Ellikqala rayonında transport infrastrukturasın jaqsılaw hám xalıq ushın jáne de qolaylı sharayat jaratıw maqsetinde jańa jol ótkizgish paydalanıwǵa tapsırıldı.

Ellikqala rayonı Dumanqala MPJ aymaǵınan ótiwshi jergilikli áhmiyetke iye 95V152 “D239 avtomobil jolı (40 km) nan — Sarabiy APJǵa” avtomobil jolınıń 5—6-km aralıǵında avtomobil jolı hám temir jol kesilispesinde jańa jol ótkizgish qurıp pitkerildi.

Bul imarattıń uzınlıǵı 18 metr, eni bolsa 10 metrdi quraydı. Bul jol ótkizgish avtomobil hám temir jol háreketin bir-birinen ajıratqan halda, qáwipsizlikti támiyinlewde úlken áhmiyetke iye.

Jańa jol ótkizgishtiń iske túsiriliwi nátiyjesinde transport aǵımı tártipke salınıp, temir jol kesilispelerinde júzege keletuǵın tıǵılıs hám keshigiwlerdiń aldı alınadı. Eń tiykarǵısı, bul joybar aymaq turǵınları ushın qatnawdı jáne de qolaylı, tez hám qáwipsiz etedi.