⚡️Avtomobil jollarındaǵı qurılıs jumısları hám ońlawǵa mútáj kópirlerdiń jaǵdayı úyrenildi

Avtomobil jolları komiteti baslıǵınıń orınbasarı Shuxrat Nazarov Qaraqalpaqstan Respublikası Avtomobil jolları bas basqarması baslıǵı Umrbek Matnazarov penen birgelikte A380 “Ǵuzar — Buxara — Nókis — Beynew” xalıqaralıq avtomobil jolınıń 673—698-kilometrleri aralıǵındaǵı 25 kilometrlik bólegin cement-beton qaplaması menen rekonstrukciyalaw jumısları processi menen tanıstı. Úyreniw dawamında ámelge asırılıp atırǵan jumıslardıń sapası, texnologiyalıq processlerge ámel etiliwi, jol tiykarınıń bekkemligi hám qáwipsizlik talaplarına itibar qaratıldı. Juwapkerlerge jumıslardı belgilengen norma hám múddetlerde sapalı juwmaqlaw boyınsha tapsırmalar berildi.

Sonday-aq, Beruniy rayonı aymaǵındaǵı ońlawǵa mútáj jaǵdayǵa kelip qalǵan kópirlerdiń jaǵdayın úyrenip, olardı basqıshpa-basqısh ońlaw máselelerin dodaladı. Bul úyreniw jumıslarınıń maqseti – jol tarmaqlarında orınlanıp atırǵan jumıslardıń sapası hám nátiyjeliligin bahalaw, bar mashqalalardı óz waqtında anıqlap, olardı saplastırıw boyınsha anıq ilajlardı belgilew, sonday-aq, xalıqqa qáwipsiz hám qolaylı transport háreketi sharayatın jaratıwdan ibarat.