⚡️Prezidentimizdiń PQ-248-sanlı qararı ámelde: D234 avtomobil jolında ońlaw jumısları dawam etpekte

Húrmetli Prezidentimizdiń “Qaraqalpaqstan Respublikasın sociallıq-ekonomikalıq rawajlandırıwǵa qaratılǵan ilajlardı ele de jedellestiriw haqqında”ǵı PQ-248-sanlı qararı tiykarında Nókis qalasınan Taxtakópir rayonına alıp barıwshı D234 “Nókis-Shımbay-Taxtakópir” avtomobil jolınıń 59 kilometrlik bólegin ońlaw jumısları ushın 15 milliard sum qarjı ajıratılıwı belgilengen edi.

Búgingi kúnde usı qarardıń orınlanıwı sheńberinde qurılıs-ońlaw jumısları baslap jiberildi. Sonıń ishinde, joldıń 30-32-kilometrinde asfalt tósew jumısları basqıshpa-basqısh ámelge asırılmaqta. Ońlaw processleri Kegeyli rayonı Jollardan paydalanıw mámleketlik shólkemi tárepinen shólkemlestirilgen bolıp, oǵan 8 zamanagóy arnawlı texnika hám 15 jumısshı tartılǵan.

Bul qurılıs jumısları tek ǵana transport infrastrukturasın jaqsılaw emes, al xalıqtıń kúndelikli turmısın jeńilletiw, aymaqlararalıq baylanıslardı bekkemlew hám ekonomikalıq belsendilikti arttırıwǵa xızmet etedi.