⚡️O‘zbekiston Respublikasi Transport vazirining birinchi o‘rinbosari Nukus shahrida tadbirkorlar bilan uchrashdi

O‘zbekiston Respublikasi Transport vazirining birinchi o‘rinbosari M.Omarov ishtirokida Nukus shahrida tadbirkorlar bilan uchrashuv o‘tkazildi.

Uchrashuv Transport-logistika va infratuzilma yo‘nalishi bo‘yicha tashkil etilib, unda Qoraqalpog‘iston Respublikasi Transport vaziri P.Qayipbekov, Qoraqalpog‘iston Respublikasi Avtomobil yo‘llari bosh boshqarmasi boshlig‘i U.Matnazarov ham ishtirok etdi.

Tadbirda bir qancha tadbirkorlar qatnashib, o‘zlarini qiziqtirgan hamda ularni qiynab kelayotgan masalalar bo‘yicha savollar bilan murojaat qildi. Savollarga mutasaddi rahbarlar tomonidan atroflicha javob berildi, muammolarni joyida hal etish bo‘yicha taklif va tavsiyalar bildirildi.

Uchrashuv davomida transport-logistika sohasini rivojlantirish, hududlar o‘rtasidagi transport aloqalarini yaxshilash, yuk tashish jarayonlarini tezkor va samarali tashkil etish, yo‘l infratuzilmasini modernizatsiya qilish hamda tadbirkorlik faoliyatiga qulay sharoit yaratish masalalari muhokama qilindi.

Shuningdek, kelgusida ushbu yo‘nalishdagi hamkorlikni kengaytirish, mahalliy ishlab chiqaruvchilar va eksportyorlar uchun logistika xarajatlarini kamaytirish, yangi infratuzilma loyihalarini amalga oshirish bo‘yicha rejalar belgilab olindi.