⚡️”Baslamalı budjet” baǵdarlaması sheńberinde Bozataw rayonında jol infrastrukturası jaqsılanbaqta

Xalqımızdıń sociallıq turmısın jaqsılaw, xalıqımızdıń mashqalaların tikkeley olardıń qatnasıwında sheshiw maqsetinde engizilgen “Baslamalı budjet” baǵdarlamasınıń 2025-jıl 1-máwsimi sheńberinde Bozataw rayonında áhmiyetli joybar ámelge asırılmaqta.

1-máwsim juwmaqlarına bola, Bozataw PPJ aymaǵındaǵı “Ǵaressizlik”, “Ustazlar” hám “Bozataw” kósheleriniń 2 kilometr 100 metr bólegin jańadan asfaltlaw joybarı eń kóp dawıs jıynap, jeńimpaz dep tabıldı. Bul joybar xalıqtıń baslaması hám dawısı tiykarında tańlanǵan bolıp, rayon xalqınıń kóp jıllıq mashqalasın sheshiwge xızmet etedi.

Aldınǵı jılları bul jollardıń qaplaması jaramsız halǵa kelip, transport háreketi hám piyadalardıń qáwipsizligine unamsız tásir etken. Joybar juwmaǵında 2,1 kilometr uzınlıqtaǵı jol zamanagóy asfalt qaplaması menen támiyinlenedi. Nátiyjede jergilikli xalıq, ásirese oqıwshılar, jumısshı-xızmetkerler hám isbilermenler ushın qolaylı hám qáwipsiz háreketleniw imkaniyatı jaratıladı. Transport qatnawı jaqsılanıp, jol-transport hádiyseleri qáwpi azayadı.

Bul joybar “Baslamalı budjet” baǵdarlamasınıń xalıqtıń tikkeley pikiri hám dawısı tiykarında sociallıq infrastruktura mashqalaların nátiyjeli sheshiwdegi ámeliy nátiyjesi bolıp esaplanadı.