⚡️RÁSMIY MÚNÁSIBET

Sociallıq tarmaqlarda tarqalǵan múrájatlarǵa ( https://www.instagram.com/reel/DL2AbpZICXu/?igsh=MTQweGMyaGZ6Z2k5Ng==) ( https://t.me/Turtkul24news/7444) Qaraqalpaqstan Respublikası Avtomobil jolları bas basqarması rásmiy múnásibet bildiredi.

Videomúrájatta Ellikqala rayonı aymaǵındaǵı A380 “Ǵuzar-Buxara-Nókis-Beynew” avtomobil jolı ústindegi kópirde transport háreketiniń jabılıwı aqıbetinde shólkemlestirilgen aylanba jol boylap shań kóteriliwi, xalıq ushın qolaysızlıq tuwdırıp atırǵanı atap ótilgen.

Bul kópir A380 avtomobil jolınıń 607,9-kilometr (17-piket) bóleginde jaylasqan bolıp, 1972-jılı qurılǵan. Ótken jıllar dawamında tábiyǵıy faktorlar, shorlanıw hám awır júk tasıwshı transport quralları sanınıń artıwı nátiyjesinde kópir avariyalıq jaǵdayǵa kelip qalǵan.

Sol sebepli, 2025-jıl 7-marttan baslap kópirde transport háreketi toqtatılıp, aylanba jol shólkemlestirildi. Bul qarar, bárinen burın, puqaralardıń ómiri hám qáwipsizligin támiyinlew maqsetinde qabıl etilgen. Joqarıda keltirilgen jaǵdaydı jumsartıw hám xalıqtıń salamatlıǵına unamsız tásirlerdiń aldın alıw maqsetinde 1 dana suw shashıwshı arnawlı texnika (vodovoz) tartılǵan bolıp, bul jolda turaqlı suw shashıw jumısları alıp barılmaqta.

Bunnan tısqarı, sociallıq tarmaqlardıń birinde usı kópir qurılısı orınında eskertiwshi jol belgileri joq ekenligi haqqında xabar tarqalǵan. Atap aytqanda, kópirde qurılıs jumısları baslanıwınan aldın, háreket qáwipsizligin támiyinlew maqsetinde Qaraqalpaqstan Respublikası Jol háreketi qáwipsizligi basqarması menen kelisilgen halda, aylanba jol shólkemlestirilgen hám qurılıs processleri baslanıwınan aldın tómendegi qáwipsizlik quralları hámde jol belgileri ornatılǵan:

• eskertiwshi jol belgileri;

• informaciyalıq bannerler;

• janıp óship turıwshı shıraqlar;

• túngi jaqtılandırıwshı shıraqlar.

Bul ilajlar puqaralardıń qáwipsiz hám xabardar halda háreketleniwin támiyinlewge qaratılǵan bolıp, tiyisli tártipte ámelge asırılǵanın ayrıqsha atap ótemiz. Házirgi waqıtta eski kópirdi demontajlaw (buzıw) jumısları juwmaqlanǵan bolıp, jaqın kúnlerde jańa kópir qurılısınıń baslanıwı rejelestirilgen.

Húrmetli puqaralar!

Jaratılǵan waqtınsha qolaysızlıqlar ushın Sizlerden tereń keshirim soraymız. Isenimimiz kámil, alıp barılıp atırǵan hár bir jumıs – Sizlerdiń qáwipsiz, qolaylı hám turaqlı háreketleniwińiz ushın ámelge asırılmaqta.

🏢Qaraqalpaqstan Respublikası Avtomobil jolları bas basqarması málimleme xızmeti