“Baslamalı budjet” baǵdarlamasınıń 2025-jıl I-máwsiminde Tórtkól rayonı Shoraxan APJ aymaǵındaǵı “Zahiriddin Muhammad Babur” kóshesin asfaltlaw joybarı eń kóp dawıs jıynap, jeńimpaz dep tabılǵan edi.
Bul joybar sheńberinde usı kósheniń 1 kilometr 854 metrlik bólegin asfalt qaplaması menen jańalaw, xalıq ushın qolaylı hám qáwipsiz transport háreketin támiyinlew maqset etilgen. Puqaralar tárepinen alǵa qoyılǵan bul baslama orınlardaǵı infrastrukturanı jaqsılaw, sociallıq-ekonomikalıq sharayatlardı jáne de turaqlastırıwǵa xızmet etedi.
Házirgi waqıtta joybar tiykarında qurılıs-ońlaw jumısları Qaraqalpaqstan Respublikası Aymaqlıq jollarǵa buyırtpashı xızmeti mámleketlik shólkemi buyırtpashılıǵında baslap jiberilgen bolıp, jumıstı bólip alıp islewshi shólkem sıpatında “Tórtkól Lashin úmiti” JShJ tárepinen alıp barılmaqta.
Qurılıs processlerine 8 zamanagóy arnawlı texnika quralı hám 15 maman jumısshı-xızmetker tartılǵan.
✅ Bul joybar tek ǵana transport háreketin jeńillestirip qoymastan, al Shoraxan APJ turǵınları ushın kúndelikli turmıstı qolaylastıradı, abadanlastırıwǵa tiykar jaratadı hám rayondaǵı sociallıq infrastrukturanıń rawajlanıwına xızmet etedi.