Qaraqalpaqstan Respublikası Avtomobil jolları bas basqarmasında ǴXQ xızmetkerleri ushın bayram ilajı hám baspasóz konferenciyası ótkerildi

Búgin Qaraqalpaqstan Respublikası Avtomobil jolları bas basqarmasında “2025-jıldıń birinshi yarım jıllıǵında orınlanǵan jumıslar” boyınsha baspasóz konferenciyası hám 27-iyun – Baspasóz hám ǵalaba xabar quralları xızmetkerleri kúni múnásibeti menen bayram ilajı bolıp ótti.

Ilajda bas basqarma basshıları, taraw qánigeleri hám ǵalaba xabar qurallarınıń wákilleri qatnastı. Ánjumanda bas basqarma baslıǵı Umrbek Matnazarov shıǵıp sóylep, 2025-jıldıń I yarım jıllıǵında ámelge asırılǵan jumıslar – qurılıs-ońlaw jumısları, Baslamalı byudjet sheńberindegi joybarlar hám jol háreketi qáwipsizligi boyınsha kórilgen ilajlar haqqında tolıq maǵlıwmat berdi.

Bunnan keyin soraw-juwaplar bolıp ótti. Jurnalistler ózlerin qızıqtırǵan sorawlardı jollap, juwapkerlerden tiykarlanǵan juwaplar aldı.

Ilaj sońında bas basqarma baslıǵı 27-iyun – Baspasóz hám ǵalaba xabar quralları xızmetkerleri kúni múnásibeti menen jurnalistlerdi qızǵın qutlıqladı. Jol tarawın ǵalaba xabar qurallarında belsene sáwlelendirip kiyatırǵan jurnalistlerge minnetdarshılıq xatları hám estelik sawǵaların tapsırdı.