⚡️Qaraqalpaqstan Respublikası Transport ministrligi, Transport qadaǵalaw inspekciyası hám Qaraqalpaqstan Respublikası Avtomobil jolları bas basqarması menen birgelikte baspasóz konferenciyası hámde Press-tur shólkemlestirildi

Baspasóz konferenciyasınan soń Press-tur dawamında jurnalistler mobil tárezi punktlerinde alıp barılıp atırǵan reyd ilajlarında qatnastı. Bul ilaj sheńberinde júk avtomobilleriniń belgilengen salmaq normalarına ámel etiw jaǵdayı qadaǵalanıp, transport qurallarınıń texnikalıq jaǵdayı hám qáwipsizlik talaplarına muwapıqlıǵı úyrenildi.

Sonday-aq, Transport qadaǵalaw inspekciyası Avtomobil hám suw transportında qadaǵalaw Qaraqalpaqstan Respublikası aymaqlıq bólimi hám JPX inspektorları menen birgelikte reyd ilajları alıp barıldı. Jol háreketi qaǵıydalarında jolawshı tasıwǵa baylanıslı belgilengen talaplarǵa ámel etpey, belgilengen normalardı buzǵan aydawshılarǵa tiyisli shara kóriliwi boyınsha jurnalistler tárepinen jumıs proccesi kózden ótkerildi.

Press-tur sheńberinde Húrmetli Prezidentimizdiń 2024-jıl 24-dekabr kúngi “2025 – 2027-jıllarda Ózbekstan Respublikasınıń sociallıq hám óndirislik infrastrukturasın rawajlandırıw ilajları haqqında”ǵı PQ-454-sanlı qararı tiykarında D234 (4R176) “Nókis-Shımbay-Taxtakópir” avtomobil jolınıń 6-7-kilometr bóleginde alıp barılıp atırǵan rekonstrukciya jumısları menen tikkeley tanıstı. Obektti kózden ótkeriw waqtında asfalt qaplamasınıń sapası, jol qurılısında qollanılıp atırǵan texnologiyalar hám normativlik hújjetlerge muwapıqlıǵı, laboratoriya sınaqları processleri haqqında hár tárepleme maǵlıwmatlar usınıldı.

Bul ilajlar transport tarawında ashıq-aydınlıqtı támiyinlew, keń jámiyetshilikti jol infrastrukturasın rawajlandırıw baǵdarındaǵı jumıslar menen jaqınnan tanıstırıw, bar mashqalalardı ornında kórip shıǵıw hám olardı sheshiw jolların anıqlawda úlken áhmiyetke iye boldı.