⚡️Moynaqta piyadalar qáwipsizligi jolında gezektegi ámeliy qádem

Búgingi kúnde elimizde jol infrastrukturasın rawajlandırıw menen birge, piyadalar háreketi qáwipsizligin támiyinlewge de úlken itibar qaratılmaqta. Ásirese, xalıq tıǵız jaylasqan aymaqlarda piyadalar jolların qurıw arqalı watanlaslarımızǵa jáne de qolaylı hám qáwipsiz sharayatlar jaratıw áhmiyetli wazıypaǵa aylanǵan.

Usı maqsette, Moynaq rayonı aymaǵınan ótetuǵın 95V148 (4N110) “Moynaq qalası – Aralboyı pristanı” avtomobil jolınıń 0-5 kilometr aralıǵında piyadalar jolı qurılısı baslandı. Bul jumıslar Moynaq rayonı Jollardan paydalanıw mámleketlik shólkemi tárepinen ámelge asırılmaqta.

Bul piyadalar jolınıń qurılısı xalıqtıń kúndelikli háreket qáwipsizligin arttırıwda áhmiyetli faktor boladı. Moynaq qalası hám Aralboyı pristanı aralıǵı – transport háreketi salıstırmalı tıǵız bolǵan jónelislerden biri bolıp, bul jerde piyadalar, ásirese, balalar, jası úlkenler hám velosipedshiler kóp háreketlenedi.

Piyadalar jolı qurılısı arqalı:
• Piyadalar ushın avtomobillerden bólek, qáwipsiz háreketleniw jolı jaratıladı;
• Jol-transport hádiyseleri qáwpi sezilerli dárejede azayadı;
• Kekseler hám mayıplıǵı bolǵan shaxslar ushın da erkin háreketleniw imkaniyatı jaratıladı.

Moynaqta ámelge asırılıp atırǵan bul joybar – mámleketimiz tárepinen hár bir puqaraǵa qolaylı, qáwipsiz hám zamanagóy turmıs sharayatların jaratıw baǵdarında alıp barılıp atırǵan reformalardıń ámeliy úlgisi bolıp esaplanadı. Tek ǵana iri magistrallar emes, al piyadalar jollarınıń qurılısı da jámiyetimizdiń rawajlanıwı, insan salamatlıǵı hám qáwipsizligi ushın úlken áhmiyetke iye esaplanadı.