Respublikamızdaǵı iri avtomobil jollarında rekonstrukciya jumısları alıp barılmaqta

Húrmetli Prezidentimizdiń 2024-jıl 24-dekabrdegi 454-sanlı qararınıń orınlanıwın támiyinlew maqsetinde respublikamız aymaǵında bir qansha jumıslar ámelge asırılmaqta.

Qarar tiykarında búgingi kúnde kúnde A-380 «Ǵuzar-Buxara-Nókis-Beynew» avtomobil jolınıń 698-723-km aralıǵınıń 720-723-km bóleginde asfalt tósew jumısları ámelge asırılıp, qalǵan bólimlerinde jol tiykarın islew jumısları dawam etpekte. Qurılıs jumısların jıl juwmaǵına shekem juwmaqlaw rejelestirilgen.

Sonday-aq, Nókis qalasın Xojeli rayonı menen baylanıstırıwshı Respublikalıq áhmiyetke iye D232 (4R174) «Nókis qalası – Xojeli qalası» avtomobil jolınıń 6-8-km aralıǵında asfalt tósew jumısları ámelge asırılıp, qalǵan bólimleri asfalt tósew jumıslarına tayarlanbaqta.

Bunnan tısqarı, qarar sheńberinde jáne bir obektte, yaǵnıy, D234 (4R176) «Nókis-Shımbay-Taxtakópir» avtomobil jolınıń Nókis qalası aymaǵınan ótken 0-14.3-km aralıǵında rekonstrukciya jumısları dawam etpekte. Házirgi waqıtta avtomobil jolınıń 5-6-km aralıǵında asfalt tósew jumısları ámelge asırılmaqta. ( https://t.me/joqargikenes/25555)