Sociallıq tarmaqlarda (https://t.me/Kar24Uz/48428) Nókis qalasındaǵı jollardan birinde puqara tárepinen waqtınsha buzılǵan jol bólegin óz betinshe ońlaw procesi sáwlelengen videokórinis tarqaldı. Bul múrájatqa Qaraqalpaqstan Respublikası Avtomobil jolları bas basqarması rásmiy múnásibet bildiredi.

Nókis qalasında “Aqıllı svetofor sistemasın engiziw” joybarı sheńberinde kesilispelerde zamanagóy svetoforlar ornatılıp atırǵanlıǵın málim etemiz. Bul sistemalar jol háreketi qáwipsizligin arttırıw, qala orayında transport aǵımın tártipke salıw hám tıǵılıslardıń aldın alıwǵa xızmet etedi.

Bul process dawamında injenerlik kommunikaciyaların ótkeriw hám úskenelerdi ornatıw ushın ayırım jol bóleklerinde waqtınsha qazıw jumısları alıp barılmaqta. Házirgi waqıtta bul jumıslar basqıshpa-basqısh ámelge asırılmaqta, qazılǵan jerlerdi tiklew jumısları bolsa reje tiykarında jaqın kúnlerde tolıq juwmaqlanadı.

Puqaralardıń jol jaǵdayına biypárwa bolmaǵanı hám belsendi puqaralıq poziciyası álbette, itibarǵa ılayıq. Sonıń menen birge, avtomobil jolları hám olardıń infrastrukturaları mámleket múlki esaplanadı. Sonıń ushın jollarda hár qanday ońlaw yamasa ózgertiw jumısların tek ǵana tiyisli shólkemler texnikalıq normalarǵa muwapıq ámelge asırıwı kerek.

Bunday jumıslardıń ózbasımshalıq penen orınlanıwı jumıs sapasına hám jol háreketi qáwipsizligine unamsız tásir kórsetiwi múmkin.

Qaraqalpaqstan Respublikası Avtomobil jolları bas basqarması Nókis qalasındaǵı waqtınsha buzılǵan jol bóleklerin qısqa múddette tiklewdi támiyinleydi hámde xalıqtıń sabır-taqatı hám birge islesiwine minnetdarshılıq bildiredi.

Avtomobil jollarında alıp barılıp atırǵan hár bir joybar, sonıń ishinde, “Aqıllı svetofor sisteması,” xalıqtıń abadanlıǵı, qáwipsiz hám qolaylı háreketti támiyinlew maqsetinde ámelge asırılmaqta.