⚡️Nókis qalasında jol jatıq sızıqların sızıw jumısları alıp barılmaqta

95V001 “Nókis kishi aylanba jolı” avtomobil jolınıń 16-16,5 km aralıǵı (Abdambetov kóshesi) hám D234E “Nókis bándirgisi” avtomobil jolınıń 0-0,5 km aralıǵı (Shımbay gúzarı kóshesi) bóleginde jatıq jol sızıqları jańadan sızıldı. Bul jumıslar, bir qaraǵanda, ápiwayı texnikalıq xızmet kórinisinde kóriniwi múmkin. Biraq ámelde bul process puqaralardıń ómiri hám jol háreketi qáwipsizligin támiyinlewde úlken áhmiyetke iye.

Jatıq jol sızıqları – transport qurallarınıń háreketleniw baǵdarın anıqlastırıp, tártipti saqlaw hám joldaǵı háreket qatnasıwshılarınıń óz-ara muwapıqlıǵın támiyinlewshi eń tiykarǵı qurallardan biri bolıp esaplanadı. Ásirese, túngi hám qolaysız hawa-rayı sharayatlarında bul sızıqlardıń anıq hám jarqın bolıwı aydawshılar ushın úlken qolaylıq jaratadı. Jańalanǵan jol sızıqları arqalı transport aǵımın durıs basqarıw, avtoavariyalar qáwpin azaytıw, jol-transport hádiyseleriniń aldın alıwǵa erisiledi.