⚡️Nókiste jollar jańalanbaqta

Mámleketimizde jol-transport infrastrukturasın rawajlandırıw máselesi mámleketlik siyasattıń tiykarǵı baǵdarlarınan biri bolıp tabıladı. Húrmetli Prezidentimizdiń baslamaları menen turmısqa engizilip atırǵan reformalar búgin hár bir aymaqta óz nátiyjesin bermekte. Nókis qalasındaǵı jollarda alıp barılıp atırǵan keń kólemli qurılıs jumısları da usı joqarı itibar hám ǵamqorlıqtıń ayqın kórinisi bolıp esaplanadı.

Sońǵı kúnlerde qala turmısında úlken áhmiyetke iye bolǵan baǵdarlarda asfalt tósew jumısları ámelge asırıldı. Atap aytqanda, 95V001 “Nókis kishi aylanba jolı”nıń 16-16,5 kilometrlik bólegi (Abdambetov kóshesi) hám D234E “Nókis bándirgisine” alıp barıwshı avtomobil jolınıń 0-0,5 kilometrlik bóleginde (Shımbay gúzarı kóshesi) jańadan asfalt tósew jumısları alıp barıldı. Bul processte 15 zamanagóy texnika hám 20 maman jumısshı mobilizaciyalanǵan.

Bul jumıslar tek ǵana asfalt tósew emes – al keleshekke qoyılǵan isenimli qádem bolıp esaplanadı. Endi bul jollarda qatnaw jáne de jeńillesedi, háreket qáwipsizligi artadı, jolawshılar ushın qolaylı hám zamanagóy sharayat jaratıladı. Hár bir asfaltlanǵan metr – jumısshılardıń pidákerlik miyneti, hár bir tegislengen jol – xalqımızdıń erteńgi turmısı ushın jaratılıp atırǵan sharayat.

Jollar – jámiyet rawajlanıwınıń tamırı. Olar arqalı tek avtomobiller emes, al rawajlanıw ruwxı, xalqımızdıń erteńgi abadanlıǵı aǵıp ótedi. Búgin Nókis kóshelerinde jańlap atırǵan texnika sesti, jumısshılardıń miynet páti – bul negizinde erteńgi kúnimizdiń turaqlı rawajlanıwı, abadan turmısı ushın jańlap atırǵan ún.

Sonlıqtan, Prezidentimizdiń basshılıǵında alıp barılıp atırǵan is-háreketler, húkimetimizdiń siyasatı hám qánigelerdiń mashaqatlı miynetiniń nátiyjesinde Qaraqalpaqstan Respublikasınıń jol tarmaqları basqıshpa-basqısh jańalanbaqta. Bul bolsa tek ǵana búgingi áwlad emes, al keleshek áwlad ushın da bekkem tiykar bolıp xızmet etedi.