⚡️3D formattaǵı piyadalar jolı sızıldı: qáwipsizlikke innovaciyalıq jantasıw

Qaraqalpaqstan Respublikası Shomanay rayonı aymaǵınan ótken D235 (4R177) “Qanlıkól” temir jol stanciyası – Shomanay qalası – Qarabaylı temir jol stanciyası” avtomobil jolınıń 43-44-kilometr aralıǵında piyadalar ótiw ornı zamanagóy kóriniste jańalanıp, 3D formatta sızıldı.

Bul joybar arqalı jolawshılar, ásirese piyadalar ushın qáwipsizlikti támiyinlew, aydawshılardıń itibarın piyadalar jollarına qaratıw hám háreket tezligin normada uslap turıw maqset etilgen.

3D piyadalar ótiw jolı – bul optikalıq illyuziya tiykarında sızılǵan jol belgisi bolıp, aydawshı onı birinshi kóriwde jol betinde biyik qutı yamasa tosıq bar sıyaqlı qabıl etedi. Bul vizual effekt nátiyjesinde aydawshılar avtomatikalıq túrde tezlikti páseytedi, itibarın arttıradı hám sol arqalı piyadalar ushın qáwip azayadı.

Bunday innovaciyalıq usıl bir neshe jıl burın Hindstannıń Gujarat qalasında birinshi márte engizilgen. Keyin ala Islandiya, Qıtay, Rossiya, Franciya, AQSH sıyaqlı mámleketlerde de keńnen qollanilgan. Ásirese, mektepler hám xalıq tıǵız jasaytuǵın aymaqlar jaqınında bul jol sızılmalarınıń nátiyjeliligi joqarı ekenligi anıqlanǵan.

Respublikamızda zamanagóy 3D formattaǵı piyadalar jolınıń engiziliwi – jol háreketi qáwipsizligin támiyinlewge qaratılǵan innovaciyalıq qádem bolıp esaplanadı. Bunday ámeliyatlar tek ǵana qáwipsizlikti arttırıp qoymastan, al jergilikli jol infrastrukturasınıń zamanagóylesiwinde de áhmiyetli ról atqaradı. Keleshekte bunday texnologiyalar basqa aymaqlarda da keńnen qollanılıwı kútilmekte.